Instagram posts and videos uploaded by voakhmer
ថ្នាក់ដឹកនាំ និងសកម្មជនសហជីពយ៉ាងហោចណាស់៩នាក់ ត្រូវបានចាប់ខ្លួនដោយមន្ត្រីនគរបាលក្នុងទីក្រុងភ្នំពេញ ពាក់ព័ន្ធនឹងការធ្វើកូដកម្មនៅមុខកាស៊ីណូណាហ្គាវើលដ៍ ដែលអូសបន្លាយពេលជិតពីរសប្តាហ៍មកហើយ។ ក៏ប៉ុន្តែ ក្នុងចំណោមអ្នកដែលត្រូវបានចាប់ខ្លួនដោយមន្ត្រីនគរបាលរាជធានីភ្នំពេញ កាលពីយប់ឆ្លងឆ្នាំសកលនោះ មាន៣នាក់ ត្រូវបានដោះលែងនៅថ្ងៃចន្ទនេះ ហើយ៦នាក់ផ្សេងទៀត ត្រូវបានបញ្ជូនខ្លួនចុះឡើងពីស្នងការដ្ឋាននគរបាលរាជធានីភ្នំពេញទៅសាលាដំបូងរាជធានីភ្នំពេញ ដើម្បីធ្វើការសាកសួរ តែមិនទាន់មានការចោទប្រកាន់ជាក់លាក់ពីសំណាក់តុលាការនៅឡើយទេ។ ការចាប់ខ្លួននេះ មិនបានបង្អាក់កូដកម្មរបស់កម្មករនិយោជិតក្រុមហ៊ុនណាហ្គាវើលដ៍នោះទេ ខណៈភាគីនិយោជកបានរក្សាភាពស្ងៀមស្ងាត់ មិនចេញមុខមកជួបចរចាជាមួយភាគីតំណាងកម្មករ។ នេះ បើតាមការបញ្ជាក់របស់មេដឹកនាំសហជីពនៅក្រុមហ៊ុនណាហ្គាវើលដ៍។ មេដឹកនាំសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម សីថរ ប្រាប់វីអូអេ នៅថ្ងៃចន្ទនេះថា កម្មករនិយោជិតមិនបញ្ឈប់កូដកម្មទេ បើគ្មានដំណោះស្រាយសមស្របដើម្បីឆ្លើយតបទៅនឹងវិវាទការងារដែលបានកើតឡើងអស់រយៈពេលជិត៩ខែមកនេះ។ កញ្ញានិយាយថា ពេលនេះ ភាគីនិយោជក មិនបានធ្វើសកម្មភាពណាមួយដើម្បីឈានទៅរកដំណោះស្រាយបញ្ចប់វិវាទទេ ហើយមានតែភាគីរដ្ឋាភិបាលក្នុងនោះ គឺសាលារាជធានីភ្នំពេញ និងក្រសួងការងារកំពុងធ្វើការដោះស្រាយវិវាទការងារដែលជាប់គាំង ដោយសារក្រុមហ៊ុនបដិសេធមិនទទួលយកថ្នាក់ដឹកនាំសហជីព សកម្មជនរបស់សហជីព និងបុគ្គលិកប្រមាណ២៧៩នាក់ឲ្យចូលធ្វើការវិញ។ 👉 សូមចូលទៅចុច Link នៅក្នុង Bio ដើម្បីអានព័ត៌មានលម្អិត • • • • • • • • • • • • #VOAKhmer #Cambodia #union #NagaWorld #laborrights
January 03, 2022
លោកនាយករដ្ឋមន្ត្រី ហ៊ុន សែន បង្ហាញមោទនភាពអំពីជ័យជម្នះក្នុងការគ្រប់គ្រងបានលើស្ថានភាពជំងឺឆ្លងកូវីដ១៩ និងភាពស៊ាំទប់ទល់នឹងជំងឺនេះ នៅកម្ពុជា ក្រោយរដ្ឋាភិបាល បង្កើនយុទ្ធនាការចាក់វ៉ាក់សាំងនៅទូទាំងប្រទេស។ ថ្លែងនៅក្នុងពិធីបើកការដ្ឋានសាងសង់ និងលើកកម្រិតគុណភាពផ្លូវជាតិលេខ ៤៨ តភ្ជាប់ខេត្តជាប់មាត់សមុទ្រ គឺខេត្តព្រះសីហនុ ទៅកាន់ខេត្តកោះកុង ដែលនៅជាប់ប្រទេសថៃ នៅថ្ងៃចន្ទនេះ លោក ហ៊ុន សែន បានលើកឡើងពីប្រសិទ្ធភាពនៃយុទ្ធនាការចាក់វ៉ាក់សាំងជំងឺកូវីដ១៩ ដែលធ្វើឲ្យមានភាពស៊ាំក្នុងសហគមន៍ ហើយបានអនុញ្ញាតឲ្យរដ្ឋាភិបាលមានលទ្ធភាពបើកដំណើរការសេដ្ឋកិច្ចប្រទេសទាំងមូលឡើងវិញ។ លោកបានថ្លែងថា៖ «ក្នុងរយៈកាលចាប់ពីយើងបើកប្រទេសឡើងវិញ ថ្ងៃ១ ខែវិច្ឆិកាហើយយើងបិទបញ្ចប់ព្រឹត្តិការណ៍ថ្ងៃ២០ ខែធ្នូ គឺ ១០ខែគត់នៃការប្រយុទ្ធនឹងជំងឺកូវីដ១៩ព្រឹត្តិការណ៍សហគមន៍ ២០ កុម្ភៈ។ ចំណូលប៉ុន្មានខែចុងឆ្នាំងើបឡើងវិញ បន្ទាប់ពីយើងចាក់វ៉ាក់សាំងគ្រប់គ្រាន់»។ ដំណាលគ្នានោះដែរលោក ហ៊ុន សែន បានបញ្ជាក់ពីស្ថានភាពល្អប្រសើរពីការគេចផុតការឆ្លងជំងឺកូវីដ១៩ នៅក្នុងសហគមន៍ទ្រង់ទ្រាយធំជាថ្មីទៀត ជាពិសេសអំឡុងពេលការប្រឡងមធ្យមសិក្សាទុតិយភូមិ ដែលបានប្រព្រឹត្តទៅកាលពីពេលថ្មីៗនេះ។ លោកប្រាប់ក្រុមមន្ត្រីរដ្ឋាភិបាលយ៉ាងដូច្នេះថា៖ «ហើយខ្ញុំសូមបញ្ជាក់ ខ្ញុំសប្បាយចិត្តជាងគេនៅត្រង់ថា ប្រឡងបាក់ឌុប យើងថាបាក់ឌុប....ភាសាពីដើម តែបើភាសាត្រូវ យើងថា ប្រឡងមធ្យមសិក្សាទុតិយភូមិ ... កូនសិស្ស ១១៥.០០០នាក់ជាងតែករណីឆ្លងកូវីដ១៩ មានតែបីប៉ុណ្ណោះ ...ពីរ គឺករណីនាំចូលពីក្រៅប្រទេស គឺចាត់តាំងឲ្យប្រឡងនៅមន្ទីរពេទ្យតែម្តង។ មួយទៀត គឺនៅបាត់ដំបង គឺមានតែ៣ករណីគត់»។ 👉សូមចូលទៅចុច Link នៅក្នុង Bio ដើម្បីអានព័ត៌មានលម្អិត • • • • • • • • • • • • #VOAKhmer #cambodia #khmer #pandemic #covid19 #covidvacccine
January 03, 2022
ប្រទេសកម្ពុជាកំពុងឈរលើក្តីសង្ឃឹមថានឹងមានការស្តារសេដ្ឋកិច្ចឡើងវិញក្រោយការរាតត្បាតនៃជំងឺកូវីដ១៩ ដោយផ្នែកលើកិច្ចព្រមព្រៀងពាណិជ្ជកម្មសេរីជាមួយប្រទេសចិន និងកូរ៉េខាងត្បូង និងសមាជិកក្នុងកិច្ចព្រមព្រៀងភាពជាដៃគូសេដ្ឋកិច្ចទូលំទូលាយក្នុងតំបន់ហៅកាត់ថា RCEP។ RCEP ជាកិច្ចព្រមព្រៀងភាពជាដៃគូសេដ្ឋកិច្ចទូលំទូលាយក្នុងតំបន់ដែលមានរួមប្រទេសទាំង១០នៃសមាគមអាស៊ាននិងប្រទេសចិន ជប៉ុនកូរ៉េខាងត្បូង អូស្ត្រាលីនិង នូវែលសេឡង់។ កិច្ចព្រមព្រៀងនេះបានចូលជាធរមានកាលពីថ្ងៃទី១ខែមករាឆ្នាំ២០២២នេះ។ បណ្តាប្រទេសជាសមាជិកនៃកិច្ចព្រមព្រៀងនេះ នឹងមានផលិតផលសរុបក្នុងស្រុកទាំងអស់ចំនួន ២៦.២ លានលានដុល្លារ ឬស្មើនឹងផលិតផលសរុបក្នុងពិភពលោកចំនួន៣០ភាគរយ។ អ្នកវិភាគបាននិយាយថារដ្ឋាភិបាលក្រុងភ្នំពេញបានព្យាយាមចូលរួមក្នុងកិច្ចព្រមព្រៀងពាណិជ្ជកម្មទាំងនេះ ខណ:ដែលកម្ពុជារងផលប៉ះពាល់សេដ្ឋកិច្ចយ៉ាងធ្ងន់ធ្ងរដោយសារការរាតត្បាតនៃជំងឺកូវីដ១៩ និងការដែលសហភាពអឺរ៉ុបដកហូតការអនុគ្រោះពន្ធខ្លះលើទំនិញនាំចូលដោយសារប្រវត្តិសិទ្ធិមនុស្សមិនល្អ និងការដើរថយក្រោយនៃលទ្ធិប្រជាធិបតេយ្យនៅក្នុងប្រទេសកម្ពុជា។ រដ្ឋមន្ត្រីក្រសួងផែនការលោក ឆាយ ថន បានថ្លែងថាកម្ពុជាបានបាត់បង់ការងារជាង៦០លាន ក្នុងសេដ្ឋកិច្ចក្រៅប្រព័ន្ធ ឬនឹងបាត់បង់ថែមទៀត ដោយសារជំងឺកូវីដ១៩ ហើយអង្គការ UNDP រំពឹងថាអាត្រាភាពក្រីក្រនៃប្រទេសកម្ពុជាអាចកើនទ្វេដងដល់១៧.៦ភាគរយនៅឆ្នាំ២០២១ដែលទើបកន្លងទៅនេះ។ «កិច្ចព្រមព្រៀងទាំងនេះពិតជាមានសារៈសំខាន់ខ្លាំងណាស់ចំពោះអនាគតនៃសេដ្ឋកិច្ចរបស់កម្ពុជា។ បណ្តាប្រទេសជិតខាងរបស់កម្ពុជានឹងក្លាយជាទីផ្សារចម្បងរបស់កម្ពុជាក្នុងអំឡុងពេលប៉ុន្មានឆ្នាំខាងមុខនេះ» ។ នេះបើតាមសម្តីរបស់លោក Bart Edes នៃមជ្ឈមណ្ឌលសិក្សាយុទ្ធសាស្ត្រនិងកិច្ចការអន្តរជាតិនៅរដ្ឋធានីវ៉ាស៊ីនតោន។ 👉សូមចូលទៅចុច Link នៅក្នុង Bio ដើម្បីអានព័ត៌មានលម្អិត • • • • • • • • • • • • #VOAKhmer #cambodia #khmer #economy #RCEP #asean
January 03, 2022
កម្មវិធីរៀនភាសាអង់គ្លេស ឬ Learning English របស់ VOAដោយរៀនពាក្យដែលប្រើប្រាស់នៅក្នុងសារព័ត៌មាន។ នៅថ្ងៃនេះ អ្នកទាំងអស់គ្នានឹងរៀនអត្ថន័យនៃពាក្យ «reunion»៕ លោកអ្នកក៏អាចទស្សនាវីដេអូនេះលើគេហទំព័រ VOA៖ bit.ly/3EqNhxL 👉សូមចូលទៅចុច Link នៅក្នុង Bio ដើម្បីទស្សនាព័ត៌មានផ្សេងៗ . . . . . . . . . #VOAKhmer #Cambodia #voalearningenglish #NewsWord #reunion #EnglishLearning
January 02, 2022
មន្រ្តីសាលារាជធានីភ្នំពេញអះអាងថាការឡើងថ្លៃសេវាប្រមូលសំរាម គឺដើម្បីឲ្យក្រុមហ៊ុនមានការប្រកួតប្រជែងគ្នាខ្ពស់ក្នុងការបំពេញការងារប្រមូលសំរាមឲ្យមានប្រសិទ្ធភាព ខណៈរដ្ឋបាលក្រុងបានអនុញ្ញាតឲ្យក្រុមហ៊ុនប្រមូលសំរាមទៅតាមខណ្ឌមួយចំនួនដែលបានកំណត់។ ប៉ុន្តែប្រជាពលរដ្ឋមួយចំនួនលើកឡើងថាតម្លៃនេះហាក់ខ្ពស់បន្តិច បើធៀបនឹងតម្លៃកាលពីពេលមុន។ តម្លៃសេវាប្រមូលសំរាមនេះគឺខុសគ្នាៗទៅតាមប្រភេទទីតាំងប្រភេទផ្ទះនិងប្រភេទអាជីវកម្មនីមួយៗ។ តារាងថ្មីនៃតម្លៃសេវាគ្រប់គ្រងសំរាមនិងសំណល់រឹងក្នុងរាជធានីភ្នំពេញ ដែលនឹងត្រូវអនុវត្តចាប់ពីថ្ងៃទី១ខែវិច្ឆិកា ឆ្នាំ២០២១ឲ្យដឹងថាប្រភេទទីតាំងទី១រួមមានផ្ទះមួយល្វែងជាន់ផ្ទាល់ដីដែលជាទីតាំងមិនប្រកបអាជីវកម្មត្រូវបង់សេវា២.៥ដុល្លារអាមេរិក ឬប្រហែល១ម៉ឺនរៀលខណៈផ្ទះ១ល្វែងជាន់ផ្ទាល់ដីដូចគ្នាដែលប្រកបអាជីវកម្មសេវាកម្ម ហាងទំនិញ ត្រូវបង់១៥ដុល្លារអាមេរិកនិងផ្ទះប្រកបអាជីវកម្មភោជនីយដ្ឋានត្រូវបង់សេវា២៥ដុល្លារអាមេរិកក្នុងមួយខែ។ ចំណែកផ្ទះមួយល្វែងជាន់លើត្រូវបង់២ដុល្លារអាមេរិក។ សេចក្តីប្រកាសព័ត៌មានរបស់រដ្ឋបាលរាជធានីភ្នំពេញ ចុះថ្ងៃទី២២ ខែតុលា ឆ្នាំ២០២១ឲ្យដឹងថាការអនុវត្តការបង់ប្រាក់ថ្លៃសេវាប្រមូលនិងដឹកជញ្ជូនសំរាមនិងសំណល់រឹងតាមតារាងបង់ប្រាក់ឆ្នាំ២០០៣ គឺមិនទាន់ឆ្លើយតបទៅនឹងកំណើនសេដ្ឋកិច្ចរបស់ប្រទេសជាតិកំណើនសន្ទស្សន៍ថ្លៃទំនិញនិងជីវភាពរស់នៅនាពេលបច្ចុប្បន្នឡើយ។ ជាពិសេសមិនមានលទ្ធភាពទូទាត់ថ្លៃសេវាសម្អាត ប្រមូលនិងដឹកជញ្ជូនសំរាមទៅកាន់ទីលានជូនប្រតិបត្តិករទាំង៣ ដែលបានប្រើប្រាស់រថយន្តដឹកសំរាម រថយន្តបោសថ្នល់ រថយន្តបាញ់លាងសម្អាតថ្នល់ និងសម្ភារប្រមូលសំរាមផ្សេងៗព្រមទាំងប្រាក់ខែបុគ្គលិកកម្មករ ការចំណាយរដ្ឋបាលរបស់សហគ្រាស និងការចំណាយរៀបចំទីលានសុវត្ថិភាពនៅឡើយ។ 👉សូមចូលទៅចុច Link នៅក្នុង Bio ដើម្បីអានព័ត៌មានលម្អិត • • • • • • • • • • • • #VOAKhmer #cambodia #khmer #garbagecollection #wastecollectionfee
January 01, 2022
រដ្ឋបាលរាជធានីភ្នំពេញ កាលពីថ្ងៃព្រហស្បតិ៍ បានចេញសេចក្តីអំពាវនាវមួយឲ្យអ្នកតវ៉ាបញ្ឈប់ការប្រមូលផ្តុំ ដោយចោទការធ្វើកូដកម្មរបស់អតីតបុគ្គលិកណាហ្គាវើលដ៍រយៈពេល២សប្តាហ៍មកនេះ«ខុសច្បាប់» ហើយ«ប៉ះពាល់ធ្ងន់ធ្ងរ»ដល់សន្តិសុខសុវត្ថិភាពសាធារណៈ។ ការណ៍នេះនាំឲ្យមានការព្រួយបារម្ភអំពីការបង្រ្កាបនៅពេលខាងមុខ ខណៈមេដឹកនាំសហជីពម្នាក់ គឺកញ្ញា ឈឹម ស៊ីថរ ត្រូវបានអាជ្ញាធរបញ្ចេញឈ្មោះថាជាអ្នកដឹកនាំការតវ៉ានេះ។ ការតវ៉ារបស់អតីតបុគ្គលិក ខណៈមិនទាន់មានដំណោះស្រាយទាក់ទងនឹងវិវាទការងារ ដែលក្នុងនោះមានការបញ្ឈប់បុគ្គលិក៣៦៥នាក់ ដែលមានទាំងមេដឹកនាំសហជីពផងដែរ។ បុគ្គលិកក៏បានទាមទារឲ្យមានការទូទាត់ប្រាក់បំណាច់ឲ្យបានសមស្រប តាមច្បាប់ការងារ ក្រោយមានការបញ្ឈប់បុគ្គលិកទ្រង់ទ្រាយធំ នៅពេលមានវិបត្តិជំងឺកូវីដ១៩។ នៅក្នុងសេចក្តីអំពាវនាវមួយចុះថ្ងៃទី៣០ ខែធ្នូ ឆ្នាំ២០២១ សាលារាជធានីភ្នំពេញបានលើកឡើងថាការតវ៉ានោះដឹកនាំដោយកញ្ញា ឈឹម ស៊ីថរ មេដឹកនាំសហជីពម្នាក់ និង«គូកន» ហើយបុគ្គលិក«បានធ្វើសកម្មភាពសម្តែងមតិដោយខុសច្បាប់នៅលើសួនច្បារសាធារណៈ និងនៅតាមដងផ្លូវសាធារណៈ «ដែលសកម្មភាពនេះបានធ្វើឲ្យប៉ះពាល់ធ្ងន់ធ្ងរដល់សន្តិសុខសុវត្ថិភាព សណ្តាប់ធ្នាប់និងរបៀបរៀបរយសាធារណៈនិងសិទ្ធិស្របច្បាប់របស់ក្រុមហ៊ុន ជាពិសេសពុំបានចូលរួមទប់ស្កាត់ការរីករាលដាលនៃជំងឺកូវីដ១៩»។ រដ្ឋបាលរាជធានីភ្នំពេញក៏បានអំពាវនាវឲ្យអ្នកតវ៉ាទាំងអស់ត្រូវបញ្ឈប់សកម្មភាពតវ៉ា។ អ្នកស្រី ហៃ សុភាព អាយុ៣៥ឆ្នាំ ដែលធ្វើការនៅក្រុមហ៊ុនណាហ្គាវើលដ៍ជាអ្នកមើលការខុសត្រូវផ្នែកចែកបៀររយៈពេល១៥ឆ្នាំមកហើយ ប្រាប់វីអូអេនៅថ្ងៃសុក្រថាការតវ៉ារបស់បុគ្គលិក ធ្វើឡើងស្របតាមច្បាប់ ក្រោយពួកគេបានព្យាយាមតស៊ូមតិជាមួយក្រុមហ៊ុនប្រមាណ៨ខែមកហើយ ប៉ុន្តែមិនមានដំណោះស្រាយឡើយ។ អ្នកស្រីបញ្ជាក់ថា៖ «អ្វីដែលពួកខ្ញុំធ្វើគឺរត់តាមនីតិវិធីច្បាប់ទាំងអស់។ អញ្ចឹងខ្ញុំអត់ដឹងថាកន្លែងណា ដែលគេមើលមកថាពួកខ្ញុំធ្វើខុសច្បាប់ទេ»។ 👉 សូមចូលទៅចុច Link នៅក្នុង Bio ដើម្បីអានព័ត៌មានលម្អិត • • • • • • • • • • • • #VOAKhmer #Cambodia #union #NagaWorld #laborrights
January 01, 2022
កូនប្រុសច្បងលោកនាយករដ្ឋមន្រីហ៊ុន សែន គឺលោកហ៊ុន ម៉ាណែតបានបន្តថ្លែងសារឌឺដងផ្លែផ្កាទៅលើការមើលស្រាលរបស់លោកសម រង្ស៊ី ចំពោះសញ្ញាបត្រសំខាន់ៗចំនួនបីដែលលោកបានទទួលនៅសហរដ្ឋអាមេរិកនិងចក្រភពអង់គ្លេស។ បើតាមសារបង្ហោះលើទំព័រផ្លូវការហ្វេសប៊ុករបស់លោកហ៊ុន ម៉ាណែតនៅថ្ងៃព្រហស្បតិ៍នេះលោកសម រង្ស៊ីបានរក្សាការស្ងៀមស្ងាត់មិនតបតទៅនឹងការទាមទាររបស់លោកហ៊ុន ម៉ាណែតឱ្យមកបង្ហាញការពិតថាសញ្ញាបត្ររបស់លោកដែលបានទទួលពីសាលានាយទាហានអាមេរិកWest Point និងសញ្ញាប័ត្រថ្នាក់ឧត្តមសិក្សាពីរផ្សេងទៀតដែលលោកបានទទួលនៅសហរដ្ឋអាមេរិកនិងចក្រភពជាប្រភេទសញ្ញាបត្រមិនត្រូវតាមស្តង់ដានោះ។ ដោយមិនបានបន្តសុំឱ្យអតីតប្រធានគណបក្សសង្គ្រោះជាតិលោកសម រង្ស៊ីមកភ្នាល់ទៀតនោះលោកហ៊ុន ម៉ាណែតដែលជាមេបញ្ជាការកងទ័ពជើងគោកនៃកងយោធពលខេមរភូមិន្ទនៅថ្ងៃព្រហស្បតិ៍នេះអំពាវនាវដល់លោកសម រង្ស៊ីឱ្យបញ្ចេញអ្នកជំនាន់ថ្មីមកប្រកួតប្រជែងជាមួយលោកផ្ទាល់ និងជាមួយយុវជនជំនាន់ក្រោយរបស់គណបក្សប្រជាជនកម្ពុជា។ លោកហ៊ុន ម៉ាណែតលើកឡើងតាមន័យដើមថា៖«បើជ្រុលជាលោកមិនហ៊ានចេញមកតតាំងផ្ទាល់ជាមួយខ្ញុំដែលជាក្មេងជំនាន់ក្រោយទេគួរតែលោកមានភាពក្លាហានក្នុងការបញ្ចេញយុវជនបន្តវេនរបស់លោក មកប្រកួតប្រជែងជាមួយខ្ញុំនិងជាមួយយុវជនជំនាន់ក្រោយរបស់គណបក្សប្រជាជនកម្ពុជាមក។ ខ្ញុំគិតថាលោកមានអាយុច្រើនហើយល្មមដល់ពេលលោកសម្រាកនិងហ៊ានលះបង់នូវមហិច្ឆតាចង់បានអំណាចរបស់លោក ដើម្បីទុកឱកាសឱ្យយុវជនជំនាន់ក្រោយបានលូតលាស់ផង»។ 👉 សូមចូលទៅចុច Link នៅក្នុង Bio ដើម្បីអានព័ត៌មានលម្អិត • • • • • • • • • • • • #VOAKhmer #cambodia #khmer #hunmanet #hunsen #politicskh #ccpcambodia #samrainsy
December 31, 2021
មេដឹកនាំនយោបាយជំទាស់លោក សម រង្ស៊ី បានចោទប្រកាន់លោកនាយករដ្ឋមន្ត្រី ហ៊ុន សែន ចំៗថា មេដឹកនាំកម្ពុជារូបនេះកំពុងរៀបចំបង្កើតឲ្យមានរបបនយោបាយបន្តវេនក្នុងក្រុមគ្រួសាររបស់លោកតាមការប្រកាសគម្រោងស្នើធ្វើច្បាប់កំណត់អាយុឲ្យចូលនិវត្តន៍សម្រាប់តំណែងនាយករដ្ឋមន្រ្តី។ នៅក្នុងពិធីសម្ពោធដាក់ឱ្យប្រើប្រាស់ជាផ្លូវការអគាររដ្ឋបាល និងសាលប្រជុំទីស្តីការក្រសួងការពារជាតិថ្មីកាលពីថ្ងៃពុធ លោក ហ៊ុន សែន បានលើកឡើងថានៅពេលលោកចាកចេញពីតំណែងលោកនឹងស្នើឲ្យមានការតាក់តែងច្បាប់កំណត់អាយុដែលត្រូវចូលនិវត្តន៍ក្នុងតំណែងនាយករដ្ឋមន្ត្រីនៅអាយុត្រឹម៧០ឆ្នាំនិងថាលោកក៏ក្លាយជាឪពុកនាយករដ្ឋមន្ត្រីនិងជីតានាយករដ្ឋមន្ត្រីនៅពេលអនាគតផងដែរ។ ការប្រកាសរបស់លោក ហ៊ុន សែន ឱ្យមានការកំណត់អាយុចូលនិវត្តន៍សម្រាប់តួនាទីជានាយករដ្ឋមន្ត្រីនោះស្របទៅតាមការចង់បានរបស់លោក សម រង្ស៊ី ដែលកាលពីខែតុលាឆ្នាំ២០២១នេះ បានស្នើឲ្យមានការបង្កើតច្បាប់ដែលតម្រូវឲ្យនាយករដ្ឋមន្ត្រីរដ្ឋមន្ត្រីនិងអ្នកកាន់តំណែងក្នុងមុខងារសាធារណៈទាំងអស់ចូលនិវត្តន៍ចាប់ពីអាយុ ៧០ឆ្នាំឡើងទៅ។ ប៉ុន្តែនៅក្រោយការបញ្ជាក់របស់លោក ហ៊ុន សែន ទាក់ទិនអាយុចូលនិវត្តន៍សម្រាប់អ្នកកាន់នាយករដ្ឋមន្ត្រីនោះលោក សម រង្ស៊ី បានបកស្រាយថាគឺជាការ«បញ្ជាក់ពីគោលបំណងនៅក្នុងការបង្កើតនូវរបបនយោបាយបែបទាយាទនិយម»។ លោក សម រង្ស៊ី លើកឡើងថាលោក ហ៊ុន សែន និយាយមិនត្រឹមត្រូវថាលោកមានអាយុ៧៣ឆ្នាំនៅពេលប្រកាសពីការកំណត់អាយុចូលនិវត្តន៍សម្រាប់តំណែងនាយករដ្ឋមន្ត្រីនោះតែតាមការពិតលោកមានអាយុត្រឹម៧២ឆ្នាំប៉ុណ្ណោះ។ នេះបើតាមសាររបស់លោក សម រង្ស៊ី ដែលបានបង្ហោះលើទំព័រហ្វេសប៊ុកផ្លូវការរបស់លោកកាលពីយប់ថ្ងៃពុធ។ 👉 សូមចូលទៅចុច Link នៅក្នុង Bio ដើម្បីអានព័ត៌មានលម្អិត • • • • • • • • • • • • #VOAKhmer #cambodia #khmer #hunmanet #hunsen #politicskh #ccpcambodia #samrainsy
December 31, 2021
លោកនាយករដ្ឋមន្រ្តី ហ៊ុន សែន បានលើកឡើងនៅចំពោះមុខក្រុមមន្ត្រីកងទ័ពនិងនគរបាលជាន់ខ្ពស់កម្ពុជាថាបដិវត្តន៍ពណ៌នៅតែបន្តមាននៅលើពិភពលោកនិងមានសន្ទុះកាន់តែខ្លាំង និងថាដើម្បីឈ្នះបដិវត្តន៍ពណ៌បានគឺមាន«វិធីតែមួយគត់គឺកាន់កម្លាំងប្រដាប់អាវុធឲ្យជាប់»។ ថ្លែងនៅក្នុងពិធីសម្ពោធដាក់ឲ្យប្រើប្រាស់ជាផ្លូវការអគាររដ្ឋបាលនិងសាលប្រជុំទីស្តីការក្រសួងការពារជាតិថ្មីក្នុងរាជធានីភ្នំពេញនៅថ្ងៃពុធនេះលោកហ៊ុន សែន បានអំពាវនាវឲ្យយោធានិងកងកម្លាំងប្រដាប់អាវុធនៅក្នុងប្រទេសរក្សាអព្យាក្រឹតភាពចំពោះគណបក្សនយោបាយទូទៅតែមិនត្រូវរក្សាអព្យាក្រឹតភាពចំពោះរដ្ឋាភិបាលហើយត្រូវធ្វើអន្តរាគមន៍ជាបន្ទាន់នៅពេលរដ្ឋាភិបាលប្រឈមនឹងការប៉ុនប៉ងផ្តួលរំលំ។ លោកបានថ្លែងថា៖ «យើងត្រូវអព្យាក្រឹត្យចំពោះមុខបណ្តាបក្សនយោបាយទាំងអស់ ដូចៗគ្នា។ យើងការពារឲ្យដូចៗគ្នា។ ឧទាហរណ៍ថា កម្លាំងនគរបាលត្រូវការពារនូវការជួបជុំណាមួយរបស់បក្សនយោបាយក្នុងការឃោសនាបោះឆ្នោត ឬក្នុងកិច្ចការរបស់គេត្រូវការពារឲ្យ។ បក្សកាន់អំណាចក៏យើងការពារបក្សមិនមែនកាន់អំណាចក៏យើងការពារ។ ក៏ប៉ុន្តែរវាងរដ្ឋាភិបាលជាមួយនិងបណ្តាបក្សនយោបាយ រាប់តែបក្សកាន់អំណាចគឺ អត់មានត្រូវអព្យាក្រឹត្យជាមួយទេ»។ នៅក្នុងសំណុំរឿងបដិវត្តន៍នេះលោកនាយករដ្ឋមន្រ្តី ហ៊ុន សែនពន្យល់ថាគន្លឹះសំខាន់ដែលមេដឹកនាំបដិវត្តន៍ចង់បានគឺស្ថិតនៅលើអព្យាក្រឹតភាពកងកម្លាំងប្រដាប់អាវុធ។ លោកក៏បានព្រមានខ្លាំងៗដកតំណែងមេដឹកនាំយោធាឬកងកម្លាំងប្រដាប់អាវុធណាដែលមិនគោរពតាមបញ្ជាឲ្យចេញទប់ស្កាត់សកម្មភាពបដិវត្តន៍ពណ៌។ លោកបានបន្តថា៖ «ដរាបណាខ្ញុំមិនទាន់ដកខ្លួនចេញពីនាយករដ្ឋមន្រ្តីទេខ្ញុំនៅតែមានសិទ្ធិបញ្ជាកងទ័ព។ កងទ័ពនគរបាល និយាយរួមកម្លាំងទាំងអស់ ដែលចំណុះនីតិប្រតិបត្តិគឺខ្ញុំបញ្ជាទាំងអស់។ មិនស្តាប់គឺ ដកចេញតែប៉ុណ្ណឹង។ ហ្អែងធ្វើខុស មានរឿងទៀត។ អញ្ចឹងត្រូវចាំ។ កុំមកចង់ធ្វើបដិវត្តន៍ពណ៌មកចាប់ហ៊ុន សែនស្អីៗ អីណា។ ចាប់មកអញ្ជើញមក មកចាប់មក»។ 👉 សូមចូលទៅចុច Link នៅក្នុង Bio ដើម្បីអានព័ត៌មានលម្អិត • • • • • • • • • • • • #VOAKhmer #cambodia #khmer #hunmanet #hunsen #politicskh #ccpcambodia #samrainsy
December 30, 2021
សហចៅក្រមស៊ើបអង្កេតនៃសាលាក្តីខ្មែរក្រហម បានសម្រេចនៅថ្ងៃពុធនេះថា សំណុំរឿង០០៤ ពាក់ព័ន្ធនឹងជនជាប់ចោទ យឹម ទិត្យ ត្រូវដាក់បញ្ចូលនៅក្នុងបណ្ណសារ ដោយឥតចាត់ការបន្តទៀតឡើយ។ ការសម្រេចនេះ ធ្វើឡើងមួយថ្ងៃ ក្រោយពីតុលាការកំពូលនៃសាលាក្តីកូនកាត់ដែលមានការចូលរួមពីអង្គការសហប្រជាជាតិ បានសម្រេចបដិសេធសំណើរបស់សហចៅក្រមស៊ើបអង្កេតអន្តរជាតិ ក្នុងការបញ្ជូនសំណុំរឿងនេះទៅជំនុំជម្រះ ដោយសារតុលាការកំពូលផ្តល់ហេតុផលថាគ្មានដីការបញ្ចូនរឿងនេះទៅជំនុំជម្រះស្ថាពរដែលអាចអនុវត្តបាន។ លោក យឹម ទិត្យ អតីតលេខាតំបន់១៣ ក្នុងសម័យខ្មែរក្រហម ត្រូវបានចោទប្រកាន់ពីបទមនុស្សឃាតគិតទុកជាមុននៃក្រមព្រហ្មទណ្ឌឆ្នាំ១៩៥៦ បទប្រល័យពូជសាសន៍ បទឧក្រិដ្ឋកម្មប្រឆាំងមនុស្សជាតិនិងការរំលោភបំពានធ្ងន់ធ្ងរលើអនុសញ្ញាទីក្រុងហ្សឺណែវឆ្នាំ១៩៤៩។ 👉 សូមចូលទៅចុច Link នៅក្នុង Bio ដើម្បីអានព័ត៌មានលម្អិត • • • • • • • • • • • • #VOAKhmer #Cambodia #khmerrougetribunal #eccc #khmerrouge
December 30, 2021
លោកនាយករដ្ឋមន្រ្តី ហ៊ុន សែន នៅថ្ងៃពុធនេះថ្លែងថា នៅពេលដែលលោកចុះចេញពីតំណែងជានាយករដ្ឋមន្រ្តី លោកនឹងស្នើច្បាប់ដើម្បីកំណត់អាយុរបស់នាយករដ្ឋមន្រ្តីត្រឹម៧០ឆ្នាំទៅតាមការចង់បានរបស់គូប្រជែងនយោបាយរបស់លោកដែលកំពុងរស់នៅឯក្រៅប្រទេស។ ការលើកឡើងរបស់លោក ហ៊ុន សែន យ៉ាងដូច្នេះ កើតមានឡើងស្របពេលលោកកំពុងត្រួសត្រាយផ្លូវឲ្យមានអ្នកបន្តវេនតំណែងរបស់លោកហើយកាលពីពេលថ្មីៗនេះកូនប្រុសច្បងរបស់លោកគឺលោកហ៊ុន ម៉ាណែត ដែលទើបតែមានអាយុ៤៤ឆ្នាំត្រូវបានក្រុមមេដឹកនាំគណបក្សកាន់អំណាចជ្រើសរើសឲ្យក្លាយជាបេក្ខភាពនាយករដ្ឋមន្ត្រីសម្រាប់ពេលអនាគត។ ថ្លែងក្នុងពិធីសម្ពោធដាក់ឲ្យប្រើប្រាស់ជាផ្លូវការអគាររដ្ឋបាល និងសាលប្រជុំទីស្តីការក្រសួងការពារជាតិថ្មីលោក ហ៊ុន សែនមិនលើកឡើងចំឈ្មោះអ្នកនយោបាយដែលមានបំណងឲ្យកំណត់អាយុរបស់នាយករដ្ឋមន្ត្រីទេតែត្រូវគេដឹងថាលោកសំដៅលើលោក សម រង្ស៊ី ដែលកាលពីពេលកន្លងទៅរិះគន់ការបង្កើតច្បាប់កំណត់សញ្ជាតិខ្មែរតែមួយសម្រាប់តំណែងកំពូលរដ្ឋបួនសំខាន់ៗថាមិនចាំបាច់សម្រាប់ប្រទេស។ លោកហ៊ុន សែនបានមានប្រសាសន៍ទៅកាន់ក្រុមនាយទាហាននិងនគរបាលកម្ពុជាយ៉ាងដូច្នេះ៖ «នៅពេលដែលខ្ញុំចាកចេញពីនាយករដ្ឋមន្រ្តី ខ្ញុំនឹងសម្រេចបំណងអ្នកដែលស្នើសុំឲ្យរៀបចំច្បាប់កំណត់អាយុចូលនិវត្តរបស់នាយករដ្ឋមន្រ្តី។ ខ្ញុំនឹងធ្វើជូន»។ នាយករដ្ឋមន្រ្តីដែលកាន់អំណាចជិតបួនទសវត្សរ៍រូបនេះក៏បានបញ្ជាក់ថា នៅការបោះឆ្នោតឆ្នាំ២០២៣ខាងមុខ លោកនឹងមានអាយុត្រឹម៧១ឆ្នាំ ខណៈអ្នកស្នើសុំដែលលោកសំដៅលើលោក សម រង្ស៊ី នឹងមានអាយុ៧៣ឆ្នាំ។លោកក៏បានជំរុញឲ្យចៅប្រុសរបស់លោកធ្វើជានាយករដ្ឋមន្រ្តីជាបន្តបន្ទាប់ផងដែរ។ «ខ្ញុំសូមបញ្ជាក់ណា៎ ពេលនេះខ្ញុំជានាយករដ្ឋមន្រ្តី ក្រោយឆ្នាំ២០២៣ខ្ញុំទៅជាឪនាយករដ្ឋមន្រ្តីដល់២០៤០ ខ្ញុំនឹងក្លាយទៅជាជីតានាយករដ្ឋមន្រ្តី។ ចាំមើលមើល។ ថ្ងៃមុនអាចៅមួយកំពុងរៀនមហាវិទ្យាល័យនៅក្រៅប្រទេស វាមកលេងស្រុក ប្រាប់អង្គុយបាយជាមួយគ្នា២០ឆ្នាំទៀតចៅឯងត្រូវប្រជែងយកតំណែងនាយករដ្ឋមន្រ្តី»។ 👉 សូមចូលទៅចុច Link នៅក្នុង Bio ដើម្បីអានព័ត៌មានលម្អិត • • • • • • • • • • • • #VOAKhmer #cambodia #khmer #hunmanet #hunsen #politicskh #ccpcambodia #samrainsy
December 30, 2021
រដ្ឋមន្ត្រីក្រសួងមហាផ្ទៃលោក ស ខេង បានថ្លែងកាលពីថ្ងៃអង្គារថា មានអ្នកជាប់ឃុំប្រមាណ៥១ភាគរយនៃអ្នកជាប់ឃុំសរុបជិត៤ម៉ឺននាក់មានជាប់ពាក់ព័ន្ធនឹងបទល្មើសគ្រឿងញៀន ហើយនៅក្នុងតែរយៈពេលមួយខែធ្នូនេះ អាជ្ញាធររឹបអូសបានគ្រឿងញៀនជាង ២តោន។ ថ្លែងក្នុងពិធីសម្ពោធដាក់ឲ្យប្រើប្រាស់មជ្ឈមណ្ឌលនីតិសម្បទាស្ថិតនៅស្រុកកណ្តាលស្ទឹង ខេត្តកណ្តាល លោកឧបនាយករដ្ឋមន្ត្រី ស ខេង បានប្រាប់ក្រុមមន្ត្រីរដ្ឋាភិបាលថា បញ្ហាគ្រឿងញៀនជាហានិភ័យធំណាស់សម្រាប់សង្គមកម្ពុជា ក្រៅពីការគំរាមកំហែងពីជំងឺឆ្លងរាតត្បាតកូវីដ១៩ ដែលនៅពេលបច្ចុប្បន្នស្ថិតក្នុងស្ថានភាពដែលអាចគ្រប់គ្រងបាននោះ។ លោកលើកឡើងយ៉ាងដូច្នេះ៖ «ប៉ុន្តែនោះសម្រាប់គ្រឿងញៀនវាគឺជាជំងឺរ៉ាំរ៉ៃ របស់សង្គមយើងទៅមុខទៀតនោះបើសិនណាជាយើងមិននាំគ្នាប្រឹងប្រែងដើម្បីនឹងជួយដោះស្រាយបញ្ហានេះទាំងអស់គ្នា»។ 👉សូមចូលទៅចុច Link នៅក្នុង Bio ដើម្បីអានព័ត៌មានលម្អិត • • • • • • • • • • • • #VOAKhmer #cambodia #khmer #drugproblems #inmates
December 30, 2021
Similar accounts
Disclaimer
The data provides is not authorized by TikTok. We are not an official partner of TikTok.
Use of materials from the resource is permitted only with a link to our resource.
Contact