class="content__text" د طالبانو لوړو زدکړو وزارت بي بي سي ته ومنله چې د سړو سیمو دولتي پوهنتونونه به راتلونکې دوشنبه د روانې کب میاشتې په ۱۵ مه چې د مارچ میاشتې له پنځمې سره برابره ده نوی تحصلي کال پیل کړي. د لوړو زده کړو وزارت ویاند حافظ ضیاالله هاشمي بي بي سي ته وویل چې دا پرېکړه د لوړو زدکړو وزارت رهبرۍ شورا کړې. د طالبانو حکومت د لوړو زدکړو وزارت د لیندۍ میاشتې په ۲۹ نېټه د یوه مکتوب په ترڅ کې ټولو دولتي او خصوصي پوهنتونو او د لوړو زدکړو موسسو کې د "نجونو تحصیل تر امر ثاني" پورې ځڼدولی وو چې پراخ غبرګونونه یې را وپارول. هغه مهال د طالبانو حکومت ویلي وو چې په دې برخه کې ځینې ستونزې شته چې سمون ته اړتیا لري. اوس د لوړو زدکړو وزارت وایي چې په ژمنیو رخصتیو کې یې د پوهنتونو ارزونه کړې او د هغوی ډېرې ستونزې یې حل کړې دي. خو د پوهنتونو د پیل په اړه له نوي اعلان نه داسې ښکاري چې لاهم د طالبانو حکومت له نظره هغه ستونزې چې د دوی له نظره د نجونو زده کوونکو په اړه شته نه دي حل شوې ځکه خو پوهنتونونه یوازې د نارینه زده کوونکو لپاره پرانیستل کېږي. بل خوا د طالبانو لوړو زدکړو وزارت په خبرتیا کې یوازې دولتي پوهنتونونه یاد شوي او د شخصي پوهنتونو یادونه نه ده شوې. د افغانستان د شخصي پوهنتونو ټولنه تمه څرګندوي چې دا پرېکړه په دوی عملي نه شي. ددې ټولنې ویاند کریم ناصري بي بي سي ته وویل شخصي پوهنتونو ته د تحصلي کال د پيل لپاره ځانګړی مکتوب ورغلی خو د نجونو یادونه نه ده پکې شوې. خو دغه ټولنه اندېښنه لري که په راتلونکې کال کې هم نجوني شخصي پوهنتونو ته د زدکړو لپاره پرې نه ښودل شي ډېر پوهنتونونه او د لوړو زده کړو موسسې به وتړل شي. ښاغلی ناصري زیاتوي: " پرته له شکه چې دا یوه لویه اندېښنه ده، له وړاندې شاوخوا ۴۰ پوهنتونونه او موسسې چې ډېری محصلانې یې نجونې دي د تړل کېدو له ګواښ سره مخ دي." ددې ټولنې د مالوماتو له مخې دا مهال په افغانستان کې شاوخوا ۱۴۰ شخصي پوهنتونونه او لوړو زده کړو موسسې فعالیت لري. دا په داسې حال کې ده چې د طالبانو لوړو زدکړو وزارت د سلواغې په اتمه شخصي پوهنتونو ته امر وکړ چې د کانکور ازموینې لپاره تر "امرثاني" پورې نجونو ته د نوم لیکنې اجازه ور نه کړي. د نوی ښوونیز او تحصلي کال لپاره ډېرې تمې وې چې طالبان به نجونې پرېږدې چې لوړې او ثانوي زده کړې وکړي. لا مالومه نه ده چې د راتلونکی ښوونیز کال لپاره به چې څو اونۍ وروسته به پیلېږي له شپږم ټولکي پورته د نجونو زده کړو په اړه به د طالبانو حکومت پریکړه څه وي.
March 02, 2023
Disclaimer
The data provides is not authorized by TikTok. We are not an official partner of TikTok.
Use of materials from the resource is permitted only with a link to our resource.
Contact